Sede ElectrónicaData:
Santiago de Compostela, 26 de maio de 2026.- A Federación Galega de Municipios e Provincias (FEGAMP) remata hoxe a Formación en Comunidades Enerxéticas para o Desenvolvemento Local que está a celebrar na súa sede, no marco do proxecto CELRURAL para fomento da implantación de enerxías renovables no eido rural para reforzar o desenvolvemento dun sistema enerxético sustentable e de proximidade en rexións transfronteirizas do espazo POCTEP.
Esta formación está dirixida a persoal técnico e representantes institucionais das administracións locais, axentes de desenvolvemento local, representantes de asociacións e entidades sociais, e outroas persoas profesionais vencelladas á sustentabilidade e á transición enerxética. Durante as dúas xornadas da formación abordáronse:
- o papel activo da cidadanía, das administracións locais e do tecido social na democratización da enerxía, así como o potencial das comunidades enerxéticas como ferramenta transformadora
- o marco legal que regula as comunidades enerxéticas desde o ámbito europeo ata a súa aplicación no contexto estatal
- o proceso completo de creación dunha comunidade enerxética, estruturado arredor das catro dimensións clave: social, enerxética, económica e administrativa
- a fase de execución e operación das comunidades enerxéticas, transformando o deseño en realidade
A formación está a ser impartida por Xavier Simón e por Almudena Fiunte. Xavier Simón é doutor en Economía Ecolóxica e catedrático do departamento de Economía Aplicada na Universidade de Vigo, e é o coordinador do proxecto EC4RURAL, que impulsa as Comunidades Enerxéticas en municipios rurais e no que a FEGAMP participa. E Almudena Fiunte é graduada en Educación Social pola Universidade de Santiago de Compostela, cun Máster en Agroecoloxía pola Universidad Internacional de Andalucía e con experiencia no deseño e impartición de accións formativas baseadas en metodoloxías participativas. É técnica superior do proxecto EC4RURAL.
